Nola ebaluatzen da Getariako txakolinaren kalitate sentsoriala?

Getariako Txakolina JDk LASEHUrekin lan egiten du, ENACek UNE-EN ISO/IEC 17025 arauan egiaztatutako erakundearekin, Getariako Txakolinaren ebaluazio sentsoriala egiteko eta, horrela, Jatorri Deituraren Erregelamenduan ezarritakoa betetzeko.

HAZI Fundazioaren auditoretzetan, Getariako Txakolina Jatorri Deiturak kontratatutako kontrol-organo gisa, inskribatutako upategien elaborazioen laginak jasotzen dira, LASEHUko (Euskal Herriko Unibertsitateko Zentzumen Analisiaren Laborategia) ebaluatzaileek zentzumenen azterketa egin dezaten.

Saio bakoitzeko laginen analisia zortzi zentzumen-ebaluatzaile adituk egiten dute. Ebaluatzaile sentsorial aditu kualifikazioa lortzeko, lehenik eta behin, hautagaiek hautaketako eta oinarrizko entrenamenduko aldez aurreko probak egin eta gainditu behar dituzte. Ondoren, berariazko entrenamendua egin behar dute produktua ebaluatzeko, eta, horretarako, kualifikazio-probak egin behar dituzte, amaierako azterketa. Gainera, saio bakoitzean, ebaluatzaile bakoitzaren jardunaren azterketa egiten da, banaka, bai eta panelarena ere, oro har.

Ebaluazio sentsoriala hasi aurretik, harmonizazio-saio bat egiten da. Saio horretan, ebaluatzaileek lagin bat edo bi ebaluatzen dituzte, eta, ondoren, taldean komentatzen dira.

Ebaluazio-paneleko kideek arau hauek bete behar dituzte:

• Puntualtasunez joatea;
• Ez kontsumitu zapore handiko produkturik (txiklea, erregaliza, gozokiak, kafea, tea edo tabakoa) proba egin baino 30 minutu lehenago, gutxienez.
• Saioen egunean bertan ez aplikatzea usain biziko edo hondarreko produktu kosmetikoak (xaboiak, lozioak, kremak, lurrinak, desodoranteak, etab.) norberaren garbitasunean eta janzkeran.
• Atseden hartua eta burua libre edukitzea;
• Proban ez du parte hartuko baldintza hauetan badago: haurdunaldia, hotzeria, sudurreko kongestioa, buruko mina, etab.

Txakolin-laginen ebaluazioa banakako kabinetan egiten da ebaluazio-gelaren barruan, eta saio bakoitzean gehienez 12 lagin ebaluatzen dira.