3. Ibilbidea: Ibai-Eder Urtegia. Nuarbe-Illarraldea (Ibilbide zirkularra)

Getariako Txakolina JDko hirugarren ibilbidean, kostaldetik Gipuzkoako barnealderantz joango gara, Azpeitia eta Beizama aldera, zuzenean Nuarbe eta Illarraldea auzoetara, Ibai-Eder urtegia dagoen lekura. Naturan murgiltzeko, deskonektatzeko eta gure Getariako Txakolina ekoizten den lurraldea dastatzeko gonbidapena.

Ibilbide zirkular honek 8´20 km neurtzen ditu eta urtegiari buelta ematen pasako dugun denbora 2 ordu izango dira gutxi gorabehera. Urtegira iristeko Azpeitiatik Beasain aldera doan GI-22635 errepidea hartuko dugu; Nuarbe auzoa pasa eta 1´7 kilometrotara dago kokatua 1991. urtean eraikitako eta Urola kostako, Beheko eta Erdiko 68.000 biztanle zerbitzatzen dituen urtegi eder hau. 

Eta norbaitek galdetu dezake: zer egiten du Getariako Txakolina JDrak ibilbide honetan? Ba erantzuna hauxe da: Beizamako Illarradea auzoan dago kokatua Getariako Txakolina JDran inskribatua dagoen Urkizahar upategia; Txakolin ekologikoa elaboratzen du eta upategia bisitagarria da (Ikusi Getariako Txakolina JDrako upategi bisitagarriak)

Urtegira iristen garenean “Oinezkoentzako bidea” jartzen duen kartel bat ikusiko dugu eta bidexkan sartuko gara. Ibilbidea laua da eta ez dauka inolako zailtasunik; adin guztietako pertsonek egin dezakete (zahar, gazte, umeak). Nahi izanez gero bizikletan ere egin daiteke buelta. Paseoan zehar zurezko eserlekuak daude eta baita Itaun izeneko iturria ere, bide zaharra eta berria bereizten dituen zubiaren parean, puntu egokiak beharrezko deskantsoak egiteko.